Kurdo Serê Xwe Rake Şiiri - Cegerxwîn

Kurdo serê xwe rake
Dengê xwe hilde, bake

Ez serbestî dixwazim
Qet bindestî naxwazim

Divêm mafê xwe bigrim
Yan jî bi rûmet bimrim

Hezar salin bi qad im
Bi tarîx û binyad im

Hetta îro nezan bûm
Di nav koma dizan bûm

Li pey şêx û mela bûm
Li çol û Kerbela bûm

Xulamokê bega bûm
Li ber lingê sega bûm

Bi navê êl û olê
Ez berdabûm li çolê

Niha ez bûme hişyar
Li hawîrî me hewar

Min daye ev soza xwe
Divêm bighêm doza xwe

Ejî bibim xwedî al
Ez nema dibim mertal

Zimanê xwe bixwênim
Tarîxa xwe bistênim

Nebim wek hirç û hovan
Bighêm rêza mirovan

Ez ne tirk im, ne ecem
Ne zor divêm, ne setem

Ez ne dîn û ne gêj im
Divêm gava bavêjim

Ez dixwazim serxwebûn
Hetta kengî perçebûn

Nevyê Silaheddîn im
Ez gernasê Hettîn im

Ola min e azadî
Ez dixwazim dilşadî

Kekê minê misilman
Nahêlî bixum têr nan

Xwîna min tim dimijî
Dixwaz min bikujî

Ez xwe nakim çêlekew
Misilmanî bû derew

Ola mezin zor û zêr
Heçî qelse diçî jêr

Hingî xurt bûm bi nav bûm
Niha ez pûç û xav bûm

Li hawîr ez dikim şîn
Hetta ku bûm cegerxwîn