Könül simi Şiiri - Sevinc Arzulu

Salam səhər qardaşım,
Salam günorta bacım.
Sizlərə vardır mənim
Nə qədər ehtiyacım.

Sərin, qərib axşam da ,
Yaxın dostum, sirdaşım.
Gülümsəyib baxsam da,
Köksünə axır yaşım.

Siz mənim dərd anlayan,
Mehriban dostlarımsız.
Şəlalətək çağlayan,
Şeir tək tostlarımsız.

Unutmaram sizləri,
Siz də unutmayın heç.
Sən ey qaranlıq gecə,
Mənim günahımdan keç.

Olsam neçə yol xəstə,
Tək səni oyatmışam.
Baş qoyub sinən üstə,
Qana-tərə batmışam.

Ikimiz də dost kimi,
Əl-ələ tutuşmüşuq.
Uzaqlaşdırıb kini,
Kədəri unutmuşuq.

Sevirəm mən sizləri,
Ilin dörd fəsli kimi.
Dolacaqdır gözlərim,
Çalanda könül simi.