Köçüb gelmisin Şiiri - Sevinc Arzulu

Dəli, gur selləri axın bilmədin,
Dənizi əziz dost seçib gəlmisən.
Gündüzü ruhuna yaxın bilmədin,
Gecənin içindən keçib gəlmisən.

Sən məni yaşadan odlu nəfəsdin,
O fani dünyaya bağlayan kəsdin.
Yanıma gəlməyə nahaq tələsdin,
Əcəl şərbətin tez içib gəlmisən.

Məhəbbət selində axmayan gülüm,
Qəlbini atəşə yaxmayan gülüm,
Bir dəfə üzümə baxmayan gülüm,
Yanıma əbədi köçüb gəlmisən.