Kimem sensiz Şiiri - Sevinc Arzulu

Kədər qara nurun çox saçacaqdır,
Ayrılıq vüsaldan gen qaçacaqdır.
Üstümdə qurulan ev uçacaqdır,
Su ilə yoğrulmuş qum himəm sənsiz.

İnsan var sevgisin qaş-daşa verir,
İnsan var sirrini sirdaşa verir.
Ahımdan buludlar baş-başa verir,
Daim qan ağlayan bir siməm sənsiz.

Çoxuna xoş gələn məlahətim var,
Həsrətə tab edən mətanətim var,
Kədərdən doğulan məhəbbətim var,
Özüm də bilmirəm mən kiməm sənsiz.