Keçer üreyimden Şiiri - Sevinc Arzulu

Yoxmu dadına qaçanın,
Qalmayıbdır yarı canın.
Çarpar məni həyəcanın,
Təlaş keçər ürəyimdən.

Nə əvvəlki vədə olsun,
Nə əlimdə badə olsun.
Özüm kimi sadə olsun,
Ağ aş keçər ürəyimdən.

Dava gedər tac üstündə,
Qızıl-gümüş bac üstündə.
Bişirilsin sac üstündə,
Lavaş keçər ürəyimdən.

Həsrət, hicran acı tamdır,
Vüsal isə şirin kamdır.
Dörd tərəfim istehkamdır,
Savaş keçər ürəyimdən.

Qu gölündə sonam batar,
Fəryadı göylərə çatar.
Yolu iki bölən qatar,
Yavaş keçər ürəyimdən.