Kapuna Geldi Âsîler

Kapuna geldi âsîler şefâat yâ Resûlallâh
Suçunu bildi kâsîler şefâat yâ Resûlallâh

Kapundan özge yok kapum tapundan özge yok tapum
Bu dem geldüm bilip suçum şefâat yâ Resûlallâh

Garîk-i bahr-i isyânum harîk-i nâr-ı hicrânum
Fakîrüm zâr u giryânum şefâat yâ Resûlallâh

Yolum seddeyledi ayâr kılup gurbette işüm zâr
Elüm tut lutfile kurtar şefâat yâ Resûlallâh

Ne itdüm ise ben itdüm ya geldüm nefse zulm itdüm
Henüz cürmüm bilüp geldüm şefâat yâ Resûlallâh

Ne ilmüm var ne a‘mâlüm perîşân cümle ahvâlüm
Tolu vesvâsile bâlüm şefâat yâ Resûlallâh

Bu Şemsî abd-i âbıkdur ne itsen ana lâyıkdur
Velî yolunda sâdıkdur şefâat yâ Resûlallâh