Jiyana Xirab Şiiri - Mehmet Çobanoğlu

Vê dinê de xirabî neqedîya
Ji derdane, kulane nebaşî man
Kesera li nav dilê min de maye
Wek maran min vedide bi her deman

Gula min mezinkir zer bû çilmisî
Belgên dora gula min tev weşîyan
Xema nav dilê min de neqedîya
Hemû dert û kul ser min de meşîyan

Ax çi bû li vê dinyayê ax çi bû
Jiyaneke ne xweş ne çê tê de ye
Hemû mal û xanî li min bûn wêran
Her cîwar li bo min pêl û derya ye

Ev jiyana xirab tu ne miraze
Xerîbî û penaberî mirin e
Bextîyarî û dilgeşi tunebe
Ttim hawarî ye, gazî û qirîn e

Bi rojan û salane qîr, qetrane
Sedema rojên nexweş hejarî ye
Xweş bizanibin dermanê derdê me
Serbestî, rizgarî û azadî ye

02.10.2015
Stenbol