İlham meleyim Şiiri - Sevinc Arzulu

Silərək alın tərini,
Gözlərsən nazlı pərini.
Kimsə verməyir yerini,
Hardasan ilham mələyim.

Buğda bitməz şoranlıqda,
Gözüm görməz toranlıqda.
Nə gəzirsən qaranlıqda,
Gəl səni nura bələyim.

Aşiq eşqiylə tanına,
Şahid ola hər anına.
Çatsa da son ünvanına,
Ətrin gətirmir küləyim.

Inkar etmə sən cəzbimi,
Oxuyaraq sev nəzmimi.
Gəl özün yoxla nəbzimi,
Durubdur, vurmur ürəyim.

Qızılgülüm sozalıbdır,
Yarpağını toz alıbdır.
Yaşam eşqim azalıbdır,
Sən idin arzum, diləyim.