İlahi, qoru Şiiri - Sevinc Arzulu

Ilahi, sən özün bizləri qoru,
Biz sənin sevimli bəndələrinik.
Qoyub getdiyimiz izləri qoru,
Baxışın altında rəndələnirik.

Günahlar sıyrılıb talaşa olur,
Yer-göyü bürüyüb qırıntı, təmiz.
Insan nurlaşanda tamaşa olur,
Kükrəyib salama gəlir göy dəniz.

Suları çox yuyub günahımızı,
Indi özü belə dalğa-dalğadır.
Qoy silib aparsın çən ahımızı,
Hisslərlə çarpışmaq özü qovğadır.

Üzüb ayağını göylərə qədər,
Elə bil səmadan ümid istəyir.
Çağırma sən onu, çağırma hədər
Xəyalən masmavi bulud üstədir.