İçşimdeki acılar Şiiri - Sevinc Arzulu

Bir an səngiməyir ki,
Içimdəki acılar.
Kədər cəng deməyir ki,
Başında gül tacı var.

Qəm qalib, fərəh məğlub.
Dünyanın işi belə.
Bu yarış daim olub,
Dövrün gərdişi belə.

Nə udduq, nə uduzduq,
Biləmmədik doğrusu.
Biz nəyi ucuz tutduq,
Olduq sevda oğrusu.

Nə vaxt sevdik, sevildik
Kimsələr görmədi ki...
Hicran qəmə meyildir,
Daş barı hörmədi ki...

Arasından su sızmaz,
Hicran ilə həsrətin.
Yalan vədlə qəlb qızmaz,
Hökmüdür məhəbbətin.

Indi mənim cnımda,
Qarışqalar gəzinir.
Günahım var yanında,
Bir gün gələr,çözülür.

Görərək həqiqəti.
Bəlkə təslim olarıq.
Ucaldıb sədaqəti,
Milyon yaşa dolarıq.

Nə söz-sözə gəllik,
Nə də ayrılarıq biz.
Daim göz-gözə gəllik,
Dərddən sıyrılarıq biz.
01.10.2018