Heyranam Şiiri - Sevinc Arzulu

Ürəyi daş, özü kömür dünyanı,
Çoxdandır ki sözüm hörmür dünyanı,
Nə yaxşı ki gözüm görmür dünyanı,
Zülmətinin qarasına heyranam.

Yorulmuşam, ağac bərələr kimi,
Əkələr, biçələr, sərələr kimi.
Qırışları dərin, dərələr kimi,
Iki qaşın arasına heyranam.

Ayrılığı addımından sezir bax,
Həqiqəti ilmə-ilmə çözür,bax.
Zaman-zaman qanayıb da dözür bax
Ürəyinin yarasına heyranam.