Hesret küleyi Şiiri - Sevinc Arzulu

Ümidim tək sənə tuş olub, dostum,
Könlünün qanıyla nuş olub, dostum,.
Xəyalın kiçicik quş olub, dostum,
Döyər otağımın pəncərəsini.

Bəzən bir namərdə şikar, ov sevgi,
Göz yaşı axıdar bəyaz nov, sevgi.
Qonağım olubdur dəlisov sevgi,
Mən necə oxuyum şəcərəsini.

Bir zaman qurduğun ev də çökəsi,
Buludlar üstünə yağış tökəsi.
Dərd ilə yoğrulub hər bir tikəsi,
Kim yeyə bilər ki qəm çərəzini.

Daha alışamaz vüsalın közü,
Dillərdə gəzməz ki söhbəti-sözü.
Yaman dona girdi hicranın özü,
Bir kimsə sezmədi heç qərəzini.

Yel kimi ötəndə həsrət mələyi,
Yerə möhkəm dəydi vəslin kürəyi.
Elə bərkdən əsdi həsrət küləyi,
Dəyişdi dünyamın mənzərəsini.