Hamıdan gizlin Şiiri - Sevinc Arzulu

Səni ürəyimin bir guşəsində,
Hamıdan gizlicə dəfn eyləmişəm.
Sındırdım könlünün nur şüşəşin də,
Ilahi, nə böyük səhv eyləmişəm.

Üzbəüz gələndə halı qarışan,
Gözləri yaşaran mən olmadımmı.
Acı ayrılıqla çətin barışan,
Telində bəmbəyaz dən olmadımmı?

Sevib qaranlığın hər cəhətini,
Işıqlı dünyaya can atmadımmı.
Əzizim, qoru sən öz səhhətini,
Sağalan yaranı qanatmadımmı?

Bir daha gözünün yaşını tökmə,
Məni ağrıdacaq ümidsizliyin.
Kimsənin önündə torpağa çökmə
Çəkilə bilməz ki heç mənsizliyin.