Gûlpika Evînê Şiiri - Zandar Amari

Dema çavên min pêketî
Nema dilop ji keserê
Da min bi destên pembû yî
Avek ji ava kewserê

Bêhneka xweşî jê dihat
Wekî despêka biharê
Nîşana xweşiyê xuyat
Ew mîna gûlpika darê

Nazik û rûgeşa horî
Mîna tavê ronî dida
Evîn li nav dilê'm forî
Tama hazar fêkî dida

Dema ketî ber çavên min
Ewr û mij tevî winda bûn
Guherî rewşa halê min
Dil û kezeb bi wê şabûn

Min dîtî ew gula evîn
Bûme bilbilê li pey wê
Hizir û raman tev revîn
Hatin girêdayî bi wê