Görüşerik biz Şiiri - Sevinc Arzulu

Qüssə kədər ilə yaman yollaşır,
Fikir , xəyal ilə gələn yol daşır.
Dünyaca sevdiyim yarı, yoldaşı,
Uca İlahidən soruşarıq biz.

Sevinci itirib lal qəhər tapıb,
Gecəni bitirib al səhər tapıb,
Səmanın qoynunda sal şəhər tapıb,
Arazla Kür kimi qovuşarıq biz.

Yenə sevdamıza qara gün düşüb,
Ayrılıq vüsalla yaman öpüşüb.
Hicranın yanından gizli ötüşüb,
Sanırdım həsrətdən sovuşarıq biz.

Dünyanın işinə bələdik, deyim,
Dostları ələkdən ələdik deyim.
Hələlik söyləyim, hələlik deyim.
Nə vaxtsa, hardasa görüşərik biz..