Getdi tnha qoydu Şiiri - Sevinc Arzulu

Getdi, tənha qoydu sevdam bizləri,
Həsrətin dəymədi yerə dizləri.
Kəsilib vüsalın ayaq izləri,
Hər şey ayrılığa qalacaq deyən.

Qulaqları varmış göyün, yerin də,
Müjdəsini kimə görən verim də...
Ritminə düşməyir bircə şerim də,
Bu fələk çox hava çalacaq deyən.

Deyir küsdüyünü bağışla, barış,
Xeyrinə-şərinə qaynayıb qarış.
Məndən uzaq düşüb köhnə dost-tanış,
Könlümü tək əğyar alacaq deyən.

Kimsə ağlamaz ki ərzi- halına,
Üzünü bəzəyən qəm əhvalına.
Duyur yetməyəcək bal vüsalına,
Ümidim xəyala dalacaq deyən.