Gelerem Şiiri - Sevinc Arzulu

Külək qurudub tağları,
Viran edibdir bağları.
Yolumu kəsən dağları,
Bir anda aşım,gələrəm.

Nəğmə dedim gülə-gülə,
Şeir qoşdum qızılgülə.
Çəməndə çiçəyə,gülə
Gülüm,dolaşım.gələrəm.

Sünbüli-süsənlər ilə,
Inciyib küsənlər ilə.
Qarşımı kəsənlər ilə.
Bircə dalaşım.gələrəm.

Yoxdur taqətim,amanım,
Dərdi azalmır adamın.
Məzarı üstdə atamın,
Axar göz yaşım,gələrəm.

Şeir-İlahidən səsdir,
Şairliyim mənə bəsdir.
Mənim üçün müqəddəsdir,
Torpağım,daşım gələrəm.

Yetişsinlər səs-ünümə,
Gəlsinlər toy-düyünümə.
Yığılsınlar xoş günümə,
Dostum,sirdaşım,gələrəm.

Sevinc,sevin kamın ilə,
Tanın öz ilhamın ilə.
Icazə ver,hamı ilə
Mən vidalaşım,gələrəm.