Geldi, apardı Şiiri - Sevinc Arzulu

Suyu ilinməz idin,
Dərdi bilinməz idin.
Gözəgörünməz idin,
Duman gəldi apardı.

Bələddim vərdişinə,
Dövrani- gərdişinə
Inandım haqq işinə,
Güman gəldi, apardı.

Yıxıtma dirəyimi,
Söykərəm kürəyimi.
Bilirsən, ürəyimi
Uman gəldi, apardı.

Gördüm etibarını,
Aramadın yarını.
Gizlətmişdim tarını,
Kaman gəldi, apardı.

Neynər pislər qəlbinə,
Qara hislər qəlbinə.
Acı hisslər qəlbinə,
Daman gəldi, apardı.

Sənsiz fənadır halım,
Hardasan, qadan alım.
Oldu fələk çox zalım,
Aman, gəldi apardı.

Izlədiyim vüsalı
Özlədiyim vüsalı,
Gözlədiyim vüsalı
Zaman gəldi, apardı.