Gedirsnmi Şiiri - Sevinc Arzulu

Gedirsənmi? Gedişindən
Ipək xalım sökülər.
Hər tərəfə ilmələrin,
Qırıntısı tökülər.

Nədən qalsın ayaq altda
Ilmələrin rəngləri.
Nə susmur, nə ara vermir
Bax, telefon zəngləri.

Hər zəng edən soruşur ki,
Nə olub, nə xəbərdir.
Onlar üçün şirin olan,
Mənə acı zəhərdir.

Indi necə ayrılığın
Simasına gülüm mən.
Bir zaman dost saydığımın
Havasına gülüm mən.

Indi daha ayrılığın
Qapısı taybataydır.
Həqiqətdən qorxan vüsal
Ayrılığa bir taydır.