Gedirsense Şiiri - Dr İlhame Müslümova

Gedirsənsə birdəfəlik qərar ver,
Qalmağına bir gümanım olmasın…
Elə get ki…dönməyinə qoyma yer,
Elə get ki… gözüm səndə qalmasın…

Geri gələn körpüləri yandıraq,
İstəsən də yolun mənə çıxmasın…
Aramızda hər nə varsa donduraq,
Nəsə qalıb canımızı sıxmasın…

Baxışları üz gözümdən çəkib get,
Baxışlarım yollarından yığılsın…
Gözlərini etinasız , soyuq et,
Son ümidim gözlərində boğulsun…

Xatirəni yığdım evin küncünə,
Apar, mənə dolaşmasın bir daha…
Sevmək sənin işin deyil, incimə,
“Sevim” deyib bir də batma günaha….