Fidakarê Welat im Şiiri - Cigerxwîn

Erê dayê metirse vame ha tim!

Wekî roj im niha vame hilatim!
Ji bo ko te ji dest dijmin derênim

Wekî Zab û Ferat im, kêferat im
Dixwazim derkevim şax û zinaran

Li ber dijmin wekî lat û kelat im
Ji min dijmin ditirsî, pir dipirsî

Ku ez hatim wekî Zab û Ferat im
Didim ber xwe hemî sermayedaran

Wekî şap im di Sîpanê Xelat im
Ji dostan re hemî pertav û ronak

Ji dijmin re wekî ar im, şewat im
Ji bo jar û belengazan bihar im

Ji bo har û neyaran ez şibat im
Li tarîxê binêrin ez kuda me?

Xwedi eywan û birc û pût û lat im
Ev im ez, lê di bin destê neyaran

Eger rokê ji xew rabim du qat im
Li ber pozê neyaran xurtemêr im

Ciger-xwînim, fidakarê welat im.

Cigerxwîn

Cigerxwîn
Kayıt Tarihi : 3.3.2005 20:06:00