Eylemisen Şiiri - Sevinc Arzulu

Danışıram öz-özümə,
Baxmayırsan heç sözümə.
Kimsə görünmür gözümə,
Dərdi duman eyləmisən.

Daha xəyal gəlmir kara,
Dünya yenə geyib qara.
Baş əymərəm namərd xara,
Sən nə güman eyləmisən.

Nələr dedi falabaxan,
Başımdakı şala baxan.
Gözlərimi yolabaxan,
Möcüz uman eyləmisən.

Qəm zəmisi indi dən-dən,
Dolu vursun onu hərdən.
Dəli könlü təkcə səndən,
Sevgi uman eyləmisən.