Ey dostum Şiiri - Sevinc Arzulu

Yazıram, yaradıram gələndə ilham, ey dostum,
Şeriyyət ilə dolu mənim iç dünyam, ey dostum.
Gecədən sübhə kimi gözlərimi yummayıram,
Baxıram, cismim təkin əriyir ağ şam, ey dostum.

Sevginin zirvəsində Yusifi-Kənan oturub,
Bunca bədbəxtlər içrə necə alır kam, ey dostum.
Titrəyir barmaqlarım toxunanda ağ vərəqə.
Bilmirəm hardan düşür qəfildən axşam, ey dostum.

Sevincəm, nə tüstümü, nə də yanğımı görərlər,
Ikiyə bölünmüşəm, deyiləm bir tam, ey dostum.
Vüsala çatmayıban bəlalara düçar oldum,
Ya rəqibim arifdir, yada ki mən xam, ey dostum.
26.05.2017