Elli yaşın olardı Şiiri - Sevinc Arzulu

Doğuldun Ağdamda, gözəl guşədə,
Boy atdın çəməndə, yaşıl meşədə.
Dəstə də tutardınn qız bənövşədən,
Ətrafında dost-sirdaşın olardı.

Bir gözələ yetirərdin məhəbbət,
Üzündən yağardı həya, ar, ismət.
Araz, heyf toy olmadı ki qismət,
Kaş sənin də can yoldaşın olardı.

Neçə ermənidən qisas aldın sən,
Doğma Ağdamında şəhid oldun sən.
Bir anda ucalıb yaşa doldun sən,
Ağ mərmərdən məzar daşın olardı.

Tezliklə qələbə marşı çalınar,
Qarabağ torpağı geri alınar.
Bakıdan Agdama yollar salınar,
Səpilən su gözüm yaşı olardı.

Şəhidçün ürəklər odlanar, yanar
Bütün şəhidləri övladı sanar.
Fəxr edir səninlə Afiqlə Anar,
Yaşasaydın, əlli yaşın olardı.