Dözüm qalmayıb Şiiri - Sevinc Arzulu

Miras çoxdur, sələf tək,
Dayanıb naxələf tək.
İş dolaşıq kələf tək,
Daha çözüm qalmayıb.

Ayrılıq qumsalında,
Zərrəcik timsalında.
Ey, sənin vüsalında
Daha gözüm qalmayıb.

Yarışdıra bilmirəm,
Barışdıra bilmirəm.
Alışdıra bilmirəm,
Daha közüm qalmayıb.

Ayaq basdım adana,
Tənhalığı dadana.
Vicdansıza, nadana,
Daha sözüm qalmayıb.

Könül yarın möhtacı,
Odur bşının tacı.
Mən niyə çəkim acı,
Daha dözüm qalmayıb.