Doymayır Şiiri - Sevinc Arzulu

Bircə dəfə sakitlik ara, külək,
Tələsmə,gedirsən de hara külək.
Dörd bir yanı dağıdır qara külək,
Tufan qopur, salamat ev qoymayır,

Ürəklərə kədər,qüssə dolarmı,
Salxım söyüd saçlarını yolarmı.
Fəlakət də bunca acgöz olarmı,
Fələk sanki zülm etməkdən doymayır.

Dərə enib, dağ aşıblar deyəsən,
Bulaq üstdə rastlaşıblar deyəsən.
Asta-asta dostlaşıblar deyəsən,
Vüsal nədən hicrin gözün oymayır.

Əldə silah gəzdim eli-obanı,
Heç bilmirəm kimlə edim davanı.
Rəqibin də varmış dini-imanı,
Eh, yaramın qaysağını soymayır.