Dost sanacağından Şiiri - Sevinc Arzulu

Deyirlər əsl eşq heç zaman ölməz,
Sevən kəs dərdini kimləsə bölməz.
Evində bişməyib, qonşudan gəlməz
Baş açmaz sevdanın qanacağından.

Ayrılıq eşqimi görməzdi ki heç,
Başıma güldən tac hörməzdi ki heç.
Yatsam da yuxuma girməzdi ki heç,
Hicranın alovda yanacağından.

Qaranlıq gecənin səhəri varmış,
Cavabsız sevginin zəhəri varmış.
Deyəsən məşuqun xəbəri varmış,
Həsrətin vüsalı danacağından.

Mən sənin laləli zəmin deyiləm,
Sulara boy verən gəmin deyiləm.
Arxayın deyiləm, əmin deyiləm,
Sonunda məni də anacağından.

Qüssədən, kədərdən könlüm tox, gülüm,
Həsrətin acısı qəlbə ox, gülüm.
Ağlıma gəlməzdi məni yox, gülüm
Əğyarı yaxın dost sanacağından.