Dîvân-ı İlâhîyât 212

Bize zevk-i visâlin eyle ihsân
Meded ey Kâdir Allah'ım meded hay
Olavuz tâ anınla şâd u hândan
Meded ey Kâdir Allah'ım meded hay

Yeter yakdı ibâdı nâr-ı hasret
Safâ versin kulûba nûr-ı vuslat
Efendi lutfuna yokdur nihâyet
Meded ey Kâdir Allah'ım meded hay

İbâdın dâ'imâ işi hatâdır
Sana lâyık olan lutf u atâdır
Visâlin derd-i uşşâka devâdır
Meded ey Kâdir Allah'ım meded hay

Bir avuç hâki insân eyleyen sen
Ana yolları âsân eyleyen sen
Dahi envâ-ı ihsân eyleyen sen
Meded ey Kâdir Allah'ım meded hay

Hüdâyî bendeni kıl gamdan âzâd
Visâlinle ola tâ hurrem ü şâd
Olupdur çünki fazl u lutfa mu'tâd
Meded sultânım Allah'ım meded hay