Bizi fazliyle insân eylemişdir
Gör e lutfunu ol Rabb ü Kerîm'in
Yine hem ehl-i îmân eylemişdir
Gör e ihsânın ol Hayy ü Kadîm'in
Kalem olsa nebâtât ile eşcâr
Mürekkeb olsa deryâlarla enhâr
Yazılmaz ni'met-i sultân-ı Gaffâr
Gör e lutfunu ol Rabb ü Kerîm'in
Ânın hükmündedir dünyâ vü ukbâ
Yed-i kudretdedir ednâ vü a'lâ
Uyan gafletden ol bir merd-i dânâ
Gör e lutfunu ol Rabb ü Kerîm'in
Bizi fazliyle irgürdü hayâta
Delâlet etdi ef'âl ü sıfâta
Hidâyet eyledi envâr-ı zâta
Gör e lutfunu ol Rabb ü Kadîm'in
Olıcak bir kişide ilm ü irfân
Komaz ol sâhibin kim ede isyân
Yürü var Halik'a şükr eyle her ân
Gör e lutfunu ol Rabb ü Kerîm'in
Getirdi bizi fazliyle vücûda
Dahi hem mazhar etdi lutf u cûda
Umarız irevüz nûr-ı şühûda
Gör e lutfunu ol Rabb ü Kerîm'in
Buyurur in teuddû ni'meta'llâh
Ola gör imdi bu ma'nâdan âgâh
Hüdâyî ni'mete şükr eyle her gâh
Gör e ihsânın ol Hayy ü Kadîm'in
Kayıt Tarihi : 22.3.2016 10:24:00
Şiiri Değerlendir
© Bu şiirin her türlü telif hakkı şairin kendisine ve / veya temsilcilerine aittir.
TÜM YORUMLAR (1)