Dîvân-ı İlâhîyât 172

İhsânına müstagrakız
Yâ Rab nice şükredelim
Ehl-i atâna mülhakız
Yâ Rab nice şükredelim

Yokdan bizi var eyledin
Her derde tîmâr eyledin
İhsânın izhâr eyledin
Yâ Rab nice şükredelim

Senden durur cism ile rûh
Sendendir envâ'-ı fütûh
Etmez kifâyet ömr-i Nûh
Yâ Rab nice şükredelim

Kâğıd olup bu nüh felek
Kütb eylese ins ü melek
Lutfun yazılmaz haşredek
Yâ Rab nice şükredelim

Add eylese ni'mânı kul
Kâbil değil ihsâya ol
Yâ şükre kande bula yol
Mevlâ nice şükredelim

Meğer senden ihsân ola
Her müşkil iş âsân ola
Şükr etmeğe imkân ola
Yâ Rab nice şükredelim

Yâ Rab ezeldir ger ebed
Eyle Hüdâyî'ye meded
Yok lutfuna hadd ü aded
Mevlâ nice şükredelim