Dîvân-ı İlâhîyât 109

İçip câm-ı muhabbetden
Digil yâ Hû veyâ men Hû
Safâ sür bezm-i vahdetden
Digil yâ Hû veyâ men Hû

Kuru sevdâyı koy ey yâr
Olagör tâlib-i dîdâr
Dilersen bir gül-i bî-hâr
Digil yâ Hû veyâ men Hû

Nice bir zînet ü şöhret
Nice bir fâniye rağbet
Bula gör Hazret'e kurbet
Digil yâ Hû veyâ men Hû

Geçip sahrâ-yı âlemden
Güzer kıl arş-ı a'zamdan
Halâs ol derd ile gamdan
Digil yâ Hû veyâ men Hû

Vücûdun kûh-ı elvendi
Geçer âşıklara bendi
Hüdâyî'den işit pendi
Digil yâ Hû veyâ men Hû