Dilê Min... Şiiri - Cihat Barış

Ne xweli ne pela can im/Ne tavim ne ava zelalim/Kulilka çiyaye dilê min

Ne âlim û ne cahilim/Ne malivan ne mêvanim/B’elgiyê serê mine dilê min

Ne bê êş û ne xemgînim/Ne tenê reş, ne renginim/Kesk û zera rinde dilê min

Ne zivistan ne biharim/Ne sermayî ne jî hârim/Newroz a rengine dilê min

Ne sêwi û ne xweyi bavim/Ne birçî û ne bê avim/ Qota nanê mine dilê min

Ne bi qewm û ne bê kesim/Ne bi cil û ne bê çulim/ Kincê êtimaye dilê min

Ne zane û ne nezanim/Ne terazî ne mîzanim/Feqîyê Cizîrî'ye dilê min

Ne feqir û ne xweyi malim/Ne bê ‘ilm u ne kemalim/Xweyi ye ‘irfan e dilê min

Ne gundî ne bajarî me/Ne qerbî ne jî şerqî me/Warê Zîn’a Botan’e dilê min

Ne e'lewî û sûnnî me/Ne Kurmanc û Êzidî me/Xizmetkarê însane dilê min

Ne şa'îr û nivîskarim/Ne xebatkar û bê karim/Karsaz ê mexluqe dilê min

Ne necisim ne carîme/Ne çemim ne bê avîme /Hêsir ê Behîra’ye dilê min

Ne File û Yahudî me/Ne bê dînim, exlaqime/ Îmana mine dilê min

Ne ronahî ne tarîme/Ne cemed û ne germîme/Cennet a Baqî’ye dilê min

Ne gulfiroş ne tacîrim/Ne ensar ne muhacîrim/Rêya Pêxembere dilê min

Ne şayî û ne elemim/Ne lâl û ne jî kelâmim/ Emrê Rebb îqraye dilê min