Deli könlümün Şiiri - Sevinc Arzulu

Fələk kələfini dolaşıq saldı,
Atamı, anamı əlimdən aldı.
Bütün arzularım yarımçıq qaldı,
Çiçəyi tez soldu dəlı könlümün.

Eşitdi dünyanın kədər zəngini,
Yaşatdı qəlbində qəm ahəngini.
Görəndə həyatın qara rəngini,
Ala gözü doldu dəli könlümün.

Heç kim başa düşməz, anlamaz onu,
Geyinməz əyninə qırmızı donu.
Bir gün görərsiniz axırı-sonu,
Qara torpaq oldu dəli könlümün.