Daran, su perisi Şiiri - Sevinc Arzulu

Tellərini su yusun da,
Köynəyi geyər yosundan.
Uzaqda dur sirr-ovsundan,
Bəzən, daran su pərisi.

Dəniz gülü solmaz olar,
Su damcısı almaz olar.
Sudan ayrı qalmaz olar,
Parlar xaran, su pərisi.

Xəyalların tacı hissdir,
Duyğulara bacı hissdir.
Ayrılıq tək acı hissdir,
Qəlbi yoran, su pərisi

Atdığın həsrət oxumu,
Könlündə boş yer yoxumu?
Əksəm də sevgi toxumu,
Bitməz, şoran, su pərisi.

Gecə-gündüz öy özünü,
Dalğalarla döy özünü.
Görəmməzsən göy üzünü,
Hava toran, su pərisi.
22.02.2014