Dan ağlayır Şiiri - Sevinc Arzulu

Düşdüm eşqin atəşinə,
Dərdlə qəmin güləşinə.
Həsrət qalıb günəşinə,
Sökülməyir dan.Ağlayır.

Olan tək ona olubdu,
Yaşıl gözləri dolubdu.
Əlvan rəngləri solubdur,
Gülsüz xiyaban ağlayır.

Ayrılığa alqış düşmür,
Qarasına naxış düşmür.
Bircə damcı yağış düşmür,
Çöllü-biyaban ağlayır.

Xatirəndən süzülürəm,
Dörd bir yana düzülürəm.
Yoxluğuna üzülürəm,
Qəlbdəsən hər an, Ağlayır.

Dar günümdə dost, pənahdın,
Çəkdiyim nəfəsdin, ahdın.
Yad ellərdə padişahdın,
Könlümdə sultan.Ağlayır.

Həqiqəti danırıq biz,
Yoxluğuna yanırıq biz.
Səni daim anırıq biz,
Bəy oturub, xan ağlayır.