Dağıla xatireler Şiiri - Sevinc Arzulu

Dizlərimin üstünə,
İzlərimin üstünə,
Sözlərimin üstünə
Dağıla xatirələr.

Ilkindiniz, öndünüz
Alışmadan söndünüz.
Eh, sonunda döndünüz
Nağıla, xatirələr.

Ayrıldı gərəyimdə,
Ağrı var kürəyimdə.
Yenidən ürəyimdə,
Doğula xatirələr.

Qarası kəm telimdə,
Sirdaşı dəm elimdə.
Qorxuram qəm selində
Boğula xatirələr.

Körpə quzu mələrmi,
Bulud dolu ələrmi.
Görən bir də gələrmi.
Ağıla xatirələr.

Gələr mələk donunda,
Qəm duyular tonunda.
Dönəcəkdir sonunda
Noğula xatirələr.