Çoban-bayatı Şiiri - Sevinc Arzulu

Günlər bir-birindən ağır,
Havadan qəm-qüssə yağır,
Yoxdur əvvəlki çal-çağır,
Çalınmır çoban-bayatı

Zəfər çaldı igidlərim,
Qələbəyə şahidlərim.
Torpaq altda şəhidlərim,
Necə sevim bu həyatı.

Su iç vüsal bulağından,
Səsi qalsın qulağında.
Kasıbın ağ ulağından,
Qiymətlimi, de, bəy atı.

Dünyanın bağrı yarılmış,
Xoşbəxt günə çox darılmış.
Torpaq qanla suvarılmış,
Hər damladan gül boy atır.

Həsrət mənlə məzələnir,
Yelpiklənir, közələnir.
Yenilənir, təzələnir,
Dərdlərimin ən boyatı.