Çıxıb Şiiri - Sevinc Arzulu

ÇIXIB

Ildırım ötəndə çaxmayan oğlan,
Çay olub dənizə axmayan oğlan,
Dönüb keçmişinə baxmayan oğlan,
Boylan bax, nə isə yadında çıxıb.

Sən molla demisən hər bir hacıya,
Heç arxa olmadın ana-bacıya.
Elə öyrənmisən elə, acıya
Bu ləzzət, bu təam dadından çıxıb.

Oxuya bilirsən al hekayəti.
Könül kitabına sal hekayəti.
Dünyanın ən uzun bal hekayəti,
Sənin dörd hərfli adından çıxıb.