Çeni sevmeyim Şiiri - Sevinc Arzulu

SEVMƏYİM

Başımın üstündə hey əsəcəklər,
Hərdən barışacaq, gah küsəcəklər.
Deyəsən sonunda iş kəsəcəklər,
Zindanla bitəcək mənim sevməyim.

Səmavi mavini gölümdən alıb,
Laləni, nərgizi çölümdən alıb.
Gecəni-gündüzü əlimdən alıb,
Başıma bəladır səni sevməyim.

Dağları bürüyən dumandır, sisdir,
Həsrətin zalımdır, hicranın pisdir.
Allahın qəlbimə saldığı hissdir,
Bu qədər günahmı yəni, sevməyim?

Səni də illərin sürəti qovub,
Köksünə ayrılıq gülləri qonub,
Gecə qarası tək telləri qoyub,
Günü-gündən artan dəni sevməyim.

Əzizim, həyata küskün olmayaq,
Yazıq görünməyək, miskin olmayaq.
Ömrün payızında çiskin olmaya?
Qüssəli anımda çəni sevməyim.
02.05.2018