Cejna Me Geş Ke Şiiri - Mehmet Çobanoğlu

Dest nede birîna dilê min,
Birîna min birîneke kûre! !
Xwişkê, xwengê nelorîne,
Hêstirên çavên xwe nerijîne.

Xwişkê rabe, rabe tu here,
Îro roja cejna gelê me ye!
Ez nexweşê li nav nivînê me..
Min bihêle, tu jî rabe û here.

Û nekole jan û birîna min,
Ez li ber te digerim, rabe û here
Kincên xwe yên teze li xwe ke,
Bila rengê gelêrî jî li ser be.

Avekî bide min, rabe û here,
Lorîkan bi ser min de nerijîne,
Bi ez qurbana wan çavan;
Xwişkê negirî, rabe tu û here.

Nekole vî derdê dilê min,
Tu guliyên xwe jî bihûne,
Biskê cênigên xwe jî berde..
Kesk û sor, zer jî lê girêde!

İro bîst û yekê adarê ye,
Ev roj, ev dem ji bo evînê ye;
Dil û can, hebûn û jiyan e,
Xwişkê here û îro newroz e!

Xwişkê here û êgir pê xîne.
Û ji heval û hogiran nemîne,
Here pêtên cejna me geş ke,
Ji min re jî guleke newrozê bîne! !

Nekole vê kul û birîna min,
Îro şahî ye îro cejn û dîlan e,
Mirûzê xwe neke reşa min,
Ez ji te re dibêjim, rabe û here.

21.01.2009
Yildirim