Çavxezal Şiiri - Ömer Dilsöz

Çavxezal,
Sebra dilê min çi bêjim
Rojê tîna xwe ji dest daye
Ewr ketine dorê
Şêr birîndar ketiye
Çeqel digerin li derdorê

Çavxezal,
Sebra dilê min çi bêjim
Ma nabînî her tişt vajî bûye
Her tişt şêlû bûye
Ma dê bo kê bêjin derdê xwe
Dost û dijmin ne belî ye

Çavxezal,
Sebra dilê min çi bêjim
Ji destê qederê ruh birîndar
Ji destê te dil birîndar
Ji destê hevalan beden birîndar
Ji destê te jiyan’im birîndar

Çavxezal,
Sebra dilê min çi bêjim
Li hemberî te peyv’im stûxwar
Ji te dûriyê keserên har
Dost’im nediyar, dijmin’im nediyar
Li ser rûyê min du rondikên sar

Çavxezal,
Sebra dilê min çi bêjim
Ji kîjan gotinê dest pê bikim
Bawer bike tama wan jî nemaye
Ji kîjan janê behs bikim
Bawer bike êşa wan jî nemaye

Çavxezal,
Sebra dilê min çi bêjim
Li nav çavên te binêrim bi saetan
Û bêdeng te temaşe bikim
Bipêm tê de hemû heyam û wextan
Û yekalî ji te hez bikim.

2004-06-07/Diyarbekir

www.omerdilsoz.com