Çavê We Rohnî Newroz Hatî ye

Dengê şalûr û bilbilên awaz
Ket deşt u dolan, dikin bangewaz
Tembur dibêje, lêdixîne saz
Îro bihare, Newroz hatî ye.

Li gulîstanê, dawet û dîlan
Xemilî çîya, vebuye zozan
Bi xeml û xişr e, gerdûn û cîhan
Çavê we rohnî, Newroz hatî ye.

Bi temezîne keçikên narîn
Bi şal û şapik, xortên dilbixwîn
Dawet û dîlan, dayik dilîrîn
Rabin dîlanê, Newroz hatî ye.

Deng bi berxan ket, kar dikin war war
Lotkê didin xwe, golik û dewar
Çayir û çîmen li ser avên sar
Pez biçêrînin, Newroz hatî ye

Ji çîyan daket, pêşmergên bizot
Dijmin dilerze, dilê dostan sot
Pêxistin agir, li ser gir û qot
De rabin serxwe, Newroz hatîye

Newroza rengîn, cejna Kurdistan
Roja raperîn, tîrêja Kurdan
Bi ala rengîn rabin ser pîyan
Mizgîn li we be, Newroz hatî ye.

Fikri Amedî