Çaparaq getdin Şiiri - Sevinc Arzulu

Düşüb ayrılığın qaramatına,
Həyatın şahmat tək qara matına.
Minib fikirlərin qara atına,
Elə Kür boyunca çaparaq getdin.

Ayaqdan salaraq aranı-dağı,
Dünyanın bu çətin, zülmkar çağı.
Elə hey axtardın baxçanı-bağı,
Qızılı qumsalda taparaq getdin.

Əsiri olmusan qara röyanın,
Yoxdur anlayanın, yoxdur duyanın.
Axır ki əlindən zalım dünyanın,
Azacıq var-dövlət qaparaq getdin.

Eh, nələr umurduq bu kainatdan,
Fələk məhrum etdi hey xoş saatdan
Əzizim, bezmişdin ağır həyatdan,
Bu fani dünyadan qoparaq getdin.