Çağırdım seni Şiiri - Sevinc Arzulu

Könül sevdasını ,inan, unutmur,
Sevdiyi insanı heç ucuz tutmur.
Oğlunun ayağı hələ yer tutmur,
Qızımın toyuna çağırdım səni.

Qaraya hay verən boz ümid idim,
Inləyən,sızlayan tənha ud idim.
Dərd ilə yüklənmiş ağ bulud idim,
Gecə də, gündüz də, yağırdım səni.

Günəşi səmadan düşürtmədim ki
Kədərin qoynunda üşütmədim ki,
Özümdən başqası eşitmədi ki,
Sonuncu nəfəsdə bağırdım səni.