Bu payız ağlayar Şiiri - Sevinc Arzulu

Ulduzlar səmanı hey gümüşləyib,
Bütün yer üzünü göy gülüşləyib.
Soyuq iliyinə elə işləyib
Bu payız ağlayır bahardan ötrü.

Gah yoldan ötənə təbəssüm satır,
Gah da ki kədərin qoynunda yatır.
Elə qüssələnir, qan-tərə batır,
Bu payız ağlayır bahardan ötrü.

Hər yaşıl yarpağa sarı rəng verər,
Xəzəli xalı tək torpağa sərər.
Yatar, yuxusunda görən nə görər,
Bu payız ağlayar bahardan ötrü.