Boşalmasın kadehler (azerice)

Boşalmasın qədəhlər

Bu gecə bir qadın ağlıyacaq..
Qədəhlərin sayını artırın,
bu gün həm onun yerinə,
həm öz yerimə içəcəm.
Doldur düşüncələrimi içinə,
içim bir nəfəsdə.
Qoy dura bilmiyim ayaq üstə.
Hər addımımda sökülsün bağları,
dizlərimin.

Bilirsən,
içəndə önəmi qalmır,
geridə qoyduğum sənsən ya ayaq izlərimdi.

İçəcəm.
İçki ilə boğacam içimdəki məni.
Qoy o da sərxoş olsun,
o da unudsun,
o da uyuşsun.
Əlləri axtarmasın kömək,
tutunmadan ayaqda dursun.
Önəmli olmasın ölmək.

Bilirsən,
içəndə önəmi qalmır,
ağrıdan sevgi ağrısıdı yoxsa kötək.

Bu şüşəyə danışacam hər şeyi.
Hər dəfə süzüldükcə qədəhlərə,
qoy fərqli dadsın.
Geyinsin əyninə bütün pislikləri,
parçalasın tüstü ciyərlərimi.
Getməyim heç yerə.
Gedə bilməyim.
İçim,
İçim sənə görə.
Tanrıya da gətirin bir qədəh.
İçək onun sağlığına.
Sərxoş bir əyyaş olsun tanrım

Bilirsən,
İçəndə önəmi qalmır,
doludu yoxsa boşdu yanım.

Elcan Bayram
(Ekim 14, 2012)