Bizim ev Şiiri - Sevinc Arzulu

Payızdan seçilməyir,
Bu ev kimin evidir.
Özü də heç bilməsin,
Qəfil onu sevindir.

Qapısını aç, oxşa
Balaca cəftəsini.
Uçular bir gün, yoxsa
Keçirmə həftəsini.

Otaqları gəz, dolan
Istisini hiss elə.
Qulağında səs olan,
Ocağını his elə.

Yandır, qoy bacasından
Göyə qalxsın tüstüsü.
Bir olan hecasından,
Səni qarssın istisi.

O, bizim doğma evdir,
Üzü gülsün həmişə.
Gəlişinlə sevindir,
Baxsın üzü günəşə....