Birîndaro Dilo Şiiri - Zandar Amari

Bextê dinya reşî
Neda carek geşî
Çav nedî yek xweşî
Derdo derdo kulo
Birîndaro dilo

Suudek baş nedî
Kesekî bê xwedî
Pepukê roj nedî
Derdo derdo kulo
Birîndaro dilo

Dil bu bahra xeman
Dost û heval neman
Rewşeka bê derman
Derdo derdo kulo
Birîndaro dilo

Nexweşim bê halim
Her daîm di nalim
Bê nas û bê malim
Derdo derdo kulo
Birîndaro dilo

Lalekî bê ziman
Her bi derd û bi jan
Bi qîrîn û fîxan
Derdo derdo kulo
Birîndaro dilo

Xwelî li ser dikin
Agir li nav dikin
Çav lê tarî dikin
Derdo derdo kulo
Birîndaro dilo

Barane lehî rabû
Dil ji derve ma bu
Çi cemîdî sar bu
Derdo derdo kulo
Birîndaro dilo

Ti êş ne weha bu
Barê dil giran bu
Jiyan bi dar bu
Derdo derdo kulo
Birîndaro dilo

Li rê tijî xefik
Li axê pir dafik
Nê êl û ne bavik
Derdo derdo kulo
Birîndaro dilo