Bir kız vardı uzakda Şiiri - Sevinc Arzulu

Bir qız vardı uzaqda,
Saçları sarışındı.
Aya tərəf baxmırdı,
Günəşlə yarışırdı.

Bir qız deyirəm sənə,
Gözləri yamyaşıldı.
Görəni qərq edərdi,
Möcüzəvi işıltı.

O qızın baxışları,
Alardı səni səndən.
Min bir ətir yığardı,
Gül-çiçəkli çəməndən.

Bir qız vardı uzaqda.
Qızların qızılıydı.
Nurlu bəxti, qisməti,
Alnına yazılıydı.

Bir qız vardı uzaqda,
Gözəllərin gözüydü.
Cavanların , gənclərin
Söhbətiydi,sözüydü.

Bir qız vardı uzaqda,
Yanağı dağ laləsi.
Gülüşləri şaqraqdı,
Sanki dağ şəlaləsi.

Bir qız vardı uzaqda,
Eh, hanı o qız, hanı.
Əzizim, sən Sevinci
Şeirlərindən tanı.