Bir kız ağlayır Şiiri - Sevinc Arzulu

Doğmalar içində tənha və yalnız,
Ümidi, pənahı Tanrıdır yalnız.
Ağacın altında oturub bir qız,
Ürəyi doludur, yaman ağlayır.

Həsrətin acısı gəlməsin asan,
Göz yaşı gur yağır, elə bil leysan.
Dünyadan köçübdür sevdiyi insan,
Kimsəyə verməyir aman, ağlayır.

Qəlbində ağrıyla acının cəmi,
Bir an da qurumaz gözünün nəmi.
Özündən ağırdır fələyin qəmi.
Zəmanə yas tutur, zaman ağlayır.

Fikrinə “Niyə”si, “Axı”sı gəlir,
Yorulmuş beyninin yuxusu gəlir.
Havadan ayrılıq qoxusu gəlir,
Kəmanə kövrəlib, kaman ağlayır.

Yığışıb başına dostu, tanışı,
Hamının yerinə sükut danışır.
Kədər qəmə, qəm kədərə qarışıb,
Son görüş qəlbinə daman ağlayır.
05.01.2019